ano ang may ara sa calinog?

bag-o lang kami abot halin sa calinog, ang banwa nga sobra sa singkwenta ka kilometro halin sa iloilo. nakadtuan ko na ni sang una sang pagpa-tapaz namon ni nong cris, ang driver sa gina-obrahan ko sang una, kag kung mag info. campaign kami para sa science scholarship. medyo liblib na nga lugar kay pinaka ulihi nga banwa sa central nga parte sang probinsya kay boundary town na between iloilo kag capiz.

upod sang akon utod kag paka-isa, halin kami sa balay mga alas-otso y medya. padul-ong kami sa tiyo namon sa camp sumagaysay sa sta. barbara kay didto naga duty ang akon brother nga ma-drive sa amon pa calinog. nabalitaan ni bro. nga gaplano kami kuha driver’s license, te may kilala sya nga nakamuno nga mas dali lang iya magkuha sang lisensya didto kung i-compare sa regional office sa jaro daw mas istrikto na gid subong. te kay para wala gawa hassle didto tamon sa calinog eh.

medyo layo gid man nga banwa. maayo lang kay direcho lang amon byahe. kay ara ko sa likod sang salakyan nag pungko, nag kuha ko pic sang dalan…

nag-abot kami sa calinog mga 10:30 am. siling sang nag patigayon sa amon, mga alas tres makuha na namon ang amon lisensya. medyo dasig gid man pag file bisan damo ang tawo nga nagahulat.

te kay manug lunch time na, panyaga na lang kami anay sa ‘maykils’ eh. pagbukas ko sang isa sa mga kaldero, na-intriga ko sang adobo nga atay nga may upod nga tinanok nga itlog. amo to ang gin-order ko nga sud-an. ok man idapli sa kan-on.

tapos panyaga, nagpahunay hunay gamay. pero natalupangdan namon nga daw wala gahubas ang mga tawo haw. base sa amon nga pagpulupamangkot, offline kuno ang LTO so indi sila ka issue sang official receipt. heh, baskug, paugat big time eh. ano ja bai… hay lingawon ang kaugalingon sa pag kuha sang pictures sa palibot.

na-intriga ako sang duha ka dinosaur sa plaza…

aw sus. kasilyas gle, tag 10 pesos taga gamit. in fairness, tinlo man.

nag-abot lang ang alas tres pero wala gid nag-iban ang tawo sa gwa. offline man gihapon! pagka-alas kwatro, may announcement sa trumpa. ang mga sa layo pwede na kapuli kay basi wala na sang sakyan pero ang gusto maghulat asta alas syete sang gab-i, pwede ka pa bilin kay tapuson kuno nila process. sang sa mabalik pa kami pag ka bwas, nagdecide na lang kami hulaton eh, may L300 van man nga willing mag dul-ong pa iloilo. nakuha namon amon lisensya mga pasado alas sais, pero indi maglakat ang salakyan kung indi matapos ang iban nga taga-iloilo. no choice, hulat asta matapos eh. sunlog pa gamay ang ILECO, nag brown out pa sang may duha na lang ka tawo ang gina process. ugtas kami nga. mayo lang nagbalik man dayun ang kuryente. tsakto gid man nga alas syete kag natapos ang last client.

alas nueve run tamon ka abot sa tigbauan. medyo kapuy man pero ang importante may lisensyana kami.